डॉ. बाबासाहेब आंबेडकर अवमान प्रकरण: ६ महिन्यांच्या सक्तमजुरीची शिक्षा

मुंबई: डॉ. बाबासाहेब आंबेडकर यांच्याबद्दल अपमानास्पद वक्तव्य करणे आणि एका वकिलाला जातीवाचक शिवीगाळ करणे एका व्यक्तीला महागात पडले आहे. मुंबईतील विशेष सत्र न्यायालयाने याप्रकरणी ३२ वर्षीय शकील नामक आरोपीला दोषी ठरवत ६ महिन्यांची सक्तमजुरी आणि १० हजार रुपयांच्या दंडाची शिक्षा सुनावली आहे.

नेमक काय आहे प्रकरण ?

सरकारी पक्षाने दिलेल्या माहितीनुसार, १३ ऑक्टोबर २०१६ रोजी रात्री चेंबूर येथील वाशीनाका परिसरातील आरएनए वसाहतीजवळ ही घटना घडली होती. तक्रारदार वकील विनोद सातपुते यांनी आपली गाडी पार्क केली असता, आरोपी शकीलने त्यांना गाठले. यापूर्वी त्याच्याविरुद्ध दाखल केलेली पोलीस तक्रार मागे घेण्यासाठी त्याने सातपुते यांच्यावर दबाव आणण्याचा प्रयत्न केला. सातपुते यांनी त्यास स्पष्ट नकार दिला असता, शकीलने त्यांना जातीवाचक शिवीगाळ केली आणि भारतरत्न डॉ. बाबासाहेब आंबेडकरांबद्दल अत्यंत आक्षेपार्ह टिप्पणी केली. याप्रकरणी सातपुते यांनी तात्काळ आरसीएफ (RCF) पोलीस ठाण्यात तक्रार दाखल केली होती.

न्यायालयाचे निरीक्षण व निकाल:

विशेष न्यायाधीश वाय. पी. मनथकर यांच्या न्यायालयासमोर या खटल्याची सुनावणी झाली.

1. बचाव पक्षाचा दावा फेटाळला:

 प्रत्यक्षदर्शी साक्षीदार किंवा सीसीटीव्ही फुटेज (CCTV) उपलब्ध नसल्याचा युक्तिवाद बचाव पक्षाने केला होता. मात्र, हा संपूर्ण प्रकार भररस्त्यात, निवासी परिसर आणि दुकानांसमोर सर्वांसमक्ष घडल्याचे लक्षात घेऊन न्यायालयाने हा दावा फेटाळून लावला.

2. अॅट्रॉसिटी अंतर्गत कारवाई: 

न्यायालयाने आरोपी शकीलला अनुसूचित जाती आणि अनुसूचित जमाती (अत्याचार प्रतिबंधक) कायद्याच्या कलम ३(१)(आर) आणि ३(१)(व्ही) अन्वये दोषी ठरवून ६ महिन्यांची शिक्षा आणि दंड ठोठावला.

3. काही आरोपांतून मुक्तता:

 दरम्यान, मारहाण (कलम ३२३) आणि धमकी (कलम ५०६) या आरोपांसंदर्भात पुरेसा पुरावा नसल्याने न्यायालयाने त्याला या कलमांतून निर्दोष मुक्त केले.

बौद्ध समाजाच्या बातम्या मिळवण्यासाठी आपल्या Whatsapp ग्रुप ला इथे क्लिक करून जॉईन करा